അയ്യപ്പൻ കവിതകൾ 2
0
നീ തന്ന സസ്യശാസ്ത്രത്തിന്റെ പുസ്തകം
എനിയ്ക്കു പ്രേമകാവ്യമായിരുന്നു
പുസ്തകത്തില് അന്ന് സൂക്ഷിച്ചിരുന്ന ആലില
നിന്റെ പച്ച ഞരമ്പുകളെ ഓര്മ്മിപ്പിയ്ക്കുന്നു
അതിന്റെ സുതാര്യതയില്
ഇന്നും നിന്റെ മുഖം കാണാം...
സത്ത മുഴുവന് ചോര്ന്നു പോയ
പച്ചിലയുടെ ഓര്മ്മയ്ക്ക്
ഓരോ താളിലും ഓരോ ഇല
സൂക്ഷിച്ച ഗ്രന്ഥം
പ്രേമത്തിന്റെ ജഠരാഗ്നിയ്ക്കു
ഞാനിന്ന് ദാനം കൊടുത്തു
ഇലകളായ് നാമിനി പുനര്ജ്ജനിയ്ക്കുമെങ്കില്
ഒരേ വൃക്ഷത്തില് പിറക്കണം
എനിയ്ക്കൊരു കാമിനിയല്ല
ആനന്ദത്താലും, ദുഃഖത്താലും
കണ്ണു നിറഞ്ഞൊരു
പെങ്ങളില വേണം..
എല്ലാ ഋതുക്കളെയും
അതിജീവിയ്ക്കാനുള്ള ശക്തിയ്ക്കായ്
കൊഴിഞ്ഞ ഇലകള് പെറുക്കുന്ന
കുട്ടികളെ കാണുമ്പോള്
വസന്തത്തിന്റെ ഹൃദയത്തില്
മൃത്യു ഗന്ധം
ഉള്ളിലെ ചിരിയില് ഇലപൊഴിയും
കാലത്തിന്റെ ഒരു കാറ്റു വീശുന്നു
ക്ഷീരം നിറച്ച കിണ്ണത്തില്
നഞ്ചുവീഴ്ത്തിയതാരാണ്
നീ തന്ന വിഷം എനിയ്ക്കൗഷധമായ്
തീര്ന്നുവെന്ന് പാടിയതാരാണ്
അയ്യപ്പന്
